EL DOBLAXE EN LLINGUA ASTURIANA DE «ONE-EYED JACKS» PUE VESE N’ABIERTU

Dende esta selmana, el llargumetraxe El rostru impenetrable, doblaxe n’asturianu del clásicu One-Eyed Jacks, pue vese n’abiertu nesti PORTAFOLIU de Vimeo fechu pola Escuela de Doblaxe d’Asturies,  centru venceyáu a Wadjet Media.

Esti filme ye un western de 1961 fechu nos Estaos Xuníos d’América, dirixíu y protagonizáu por Marlon Brando, al que tamién acompangaba’l conocíu actor Karl Malden. Nun principiu empezó a dirixilu Stanley Kubrick, masque tres dellos meses sedría despedíu por desalcuerdos con Marlon Brando, qu’acabó dirixendo la película. La actriz Rosita Moreno collaboró como asesora téunica.

Dobláu al asturianu por Gonzali Producciones (anguañu Wadjet Media) estrenólu la Televisión del Principáu d’Asturies nuna emisión del 27 d’avientu de 2013, siendo la primera de les películes doblaes qu’emitiera la canal autonómica. Illán Gonzali dirixó y produció’l versionáu, que tuvo un repartu de más de venti voces. D’ente los actores y actrices de doblaxe que participaren nesti trabayu destaquen Carlos Novoa (Marlon Brando), José Antonio Lobato (Karl Malden), Ana Díaz Morán (Pina Pellicer), Andrés Presumido (Slim Pickens), Antón González (Timothy Carey) o’l va poco fallecíu Eladio Sánchez (Ray Teal).

Gran parte de la crítica consideró qu’El rostru impenetrable yera un megalómanu vanity film y un exerciciu narcisista del so direutor-actor. A la contra, la so receición n’Europa foi perbona, y asina en xunetu de 1961 recibió la Concha d’Oru nel Festival Internacional de Cine de San Sebastián.

El xixonés Illán Gonzali, per aciu la so productora, tien doblao yá amás de «El rostru impenetrable» un bon númberu de títulos en llingua asturiana, sía pal mercáu videográficu como «La nueche de los muertos vivientes», «El tercer home», «McLintock», «Los viaxes de Gulliver», «Diez negrinos «y series d’animación «Popeye», «Supermán» y «El Picatueru (Woody Woodpecker)», o sía pa la so emisión na TPA como les películes «Harry el suciu», «Orixe», «Ocean’s Eleven» o «Sherlock Holmes: Xuegu de Solombres».

ASTURIAS MUNDIAL 23/05/2019

  •  
  •  
  •  
  •  
  •  
  •  
  •  
  •  

Deja un comentario

Tu dirección de correo electrónico no será publicada. Los campos obligatorios están marcados con *